பல்லவி
ஆர் இவர் ஆராரோ -இந்த -அவனியோர் மாதிடமே
ஆனடை குடிலிடை மோனமாய் உதித்த இவ்வற்புத பால கனார்?
சரணங்கள்
பாருருவாகுமுன்னே -இருந்த -பரப் பொருள் தானிவரோ ?
சீருடன் புவி, வான் அவை பொருள் யாவையுங் சிருட்டித்த மாவலரோ? -ஆர்
மேசியா இவர் தானோ? -நம்மை மேயத்திடும் நரர்கோனோ?
ஆசையாய் மனிதருக்காய் மரித்திடும் அதி அன்புள்ள மனசானோ ?-ஆர்
தித்திக்குந் தீங்கனியோ? -நமது -தேவனின் கண்மணியோ?
மெத்தவே உலகிருள் நீக்கிடும் அதிசயமேவிய விண்ணொளியோ ?- ஆர்
பட்டத்துத் துரைமகனோ ?-நம்மைப்-பண்புடன் ஆள்பவனோ?
கட்டளை மீறிடும் யாவர்க்கும் மன்னிப்புக் காட்டிடுந் தாயகனோ?-ஆர்
ஜீவனின் அப்பமோதான்? -தாகம் -தீர்திடும்பானமோதான்?
ஆவலாய் ஏழைகள் அடைந்திடும் அடைக்கல மானவர் இவர் தானோ? -ஆர்
No comments:
Post a Comment